نهى سعيد تتوجه بالشكر إلى طاقم عمل مسلسل حواديت الشانزليزيه

وتوجهت نهى بخالص الشكر والتقدير إلى طاقم عمل المسلسل بالكامل عبر صفحتها الرسمية على موقع التواصل الاجتماعي فيس بوك قائلة “الحمد لله رب العالمين.. حواديت الشانزليزيه تجربة من أهم التجارب مش بس العملية كمان الحياتية، استمتعت بكل لحظة فيه من أول ما بدأنا نكتب من أول كلمة في المعالجة الدرامية مرورا ببناء الأحداث والحبكات والضفاير والشخصيات وكل كلمة ووصولا لآخر كلمة.. وطبعا بعد ما المسلسل انتهى عرضه هشكر كل الناس ومش هقدر اكتب أسماء عشان منساش حد، لكن هخص بالذكر بعض الناس اللي بقدر جدا حاجات كتير عملوها عشان المسلسل ده من أول لحظة ولادته لآخرها”.

وأضافت “لازم أقدر وأشكر المجهود اللي عمله صديقنا بهاء تليس واللي منعه سفره لألمانيا إنه يكمل معانا كتابة المسلسل.. لازم أشكر كل حد اشتغل في المسلسل ده من أكبر حد لأصغر حد.. الحقيقة إن كلكم بذلتوا مجهود كبير عشان نوصل للنتيجة دي”.

وتابعت “لازم أشكر كل النجوم الكبار اللي اشتغلوا في المسلسل ودبوا الروح في كلام مكتوب على ورق كان ممكن ميوصلش بالشكل اللي وصل بيه للناس، وطبعا المخرج اللي أدار كل ده”.

وأكملت “لازم أشكر شركة الانتاج الكبير سينرجي والمنتح تامر مرسي والأستاذ حسام شوقي والأستاذ فتحي إسماعيل والأستاذ فؤاد والأستاذ رامي، وكل شخص في الشركة كان داعم وسند ومحفز ومشجع وسبب بعد ربنا عشان المسلسل يخرج للنور”.

السيناريست نهى سعيد

لازم أشكر الفنان الكبير إدوارد والمخرج مرقس عادل اللي كانوا سبب أساسي لتوصيل الورق لشركة سينرجي وكان لحماسهم بالمشروع سبب كبير في إنه يخرج للنور.

لازم أشكر أهل الإعلام والصحافة المهنة اللي بنتمي ليها في الأساس، وأصدقائي وعشرة عمري اللي دعموني ودعموا المسلسل وكانوا شركاء حقيقيين في نجاحه ، لازم أشكر أي موقف أو شخص أو شئ كانوا سبب في دروس كتير اتعلمتها”.

لازم أشكر أختي رحاب اللي لولا وجودها في حياتي مكنتش عرفت أعمل حاجة أبدا وأسرتي الصغيرة اللي دايما موقفيني على رجلي، وصحابي القريبين اللي هما أسرتي الكبيرة، اليمين غيرهم مكنتش قدرت أكمل”.

واختتمت بقولها “كمان لازم أشكر ليالي السفر والسهر والتطبيق ووصل الليل بالنهار عشان الورق يخلص، والشكر موصول لكل الصحاب اللي عاشوها معانا وشهدوا على ولادة هذا الكائن الغالي ، شكرا من قلبي.. وإن شاء الله اللي جاي خير”.

ونالت نهى سعيد تكريم خاص من مؤسسة الأهرام وذلك بعد نجاح المسلسل خلال الفترة الماضية ، حيث أعربت عن سعادتها الكبيرة بهذا التكريم وأنها تسعى لتقديم المزيد من الأعمال مستقبلا.